زمان قالولى ان الانسان بيبدع فى كتابة مشاعره الحزينة
ودايما صعب يعبر عنها لو كان سعيد
بس الاكيد ان احسن حاجة فى الدنيا انك تكتب كل حياتك
تبقى كتاب قدام نفسك تسترجعه وقت ماتنسى انت مين وكنت فين
دروت فى كل السنين القريبة اللى فاتت لقيت حاجات غريبة قوى
ولمحة فرحة وانا بوصف حاجات كنت بحبها وشايفاها بنقاء
للاسف اتشوهت فى عنيا
وكمية من التخبط .. القلق.. الخوف.. والشك
حاجة غريبة قوى لما انسان يقرر انه يستمر فى علاقة كل مكتسباتها عنده حاجات سلبية
لمجرد انك بتكره الفشل.. وبتخاف تفشل لمجرد عدم احتمال احساس انك تكون ظالم
لمجرد انك تصدق دموع بتقولك انك لو بعدت حياته تنهار
لمجرد انك تشوفه بعنيك بيفقد الفرحة لو شاف لمحة حزن على وشك
لمجرد انك ماتعودتش تجرح... ماتعرفش تنهى احلام حد بناها عليك
لمجرد انك عشت فى مدينة وهمية مليئة بالاحلام
حبيت المدينة قوى لانها مثالية
وحبيت الاحلام لانها بريئة وجميلة
حتى لو كانت سراب
ده طيبة؟؟ لأ ده غباء
الظلم كده كده موجود ليه وليك
والنهاية كم من الذكريات كتيييييير قوى وتقييييييل قوى
فيه حاجات كتير جميلة وبريئة تقرر انك تعيش تفتكرها وتفرح
اه تفرح... ناس كتير تتمنى تعيش لحظة واحدة منها
حتى لو امنت انها ماكنتش حقيقة
كفاية ان عقلك فيوم امن.. صدق وفرح
الموت
فكرة اكتر من رائعة للحفاظ على ذكرى جميلة
انك تقرر ان الشخص ده مات
حتى لو شفته بعدها 100 مرة .. هترتاح قوى لانه حد يشبه صاحب الذكريات
حتى لو اصر يعرفك انه عايش
ولو اصر انه يدمر ذكرياتك الحلوة
لأ... حافظ عليها
دى بتاعتك انت وبس
الندم
ماينفعش نندم على حاجة عشناها بارادتنا
ولو رجع بينا الزمن هنعيشها تانى
طب وهوا لما يندم
برضه ماينفعش الندم
لانه كان اتفاق
ورضينا بحكمنا سوا ان القصة لازم تنتهى
وانت الطرف الاقوى ...فلازم تتحمل نتيجة استسلامك للاتفاق والقرار
الحب
قراااااااار من الالف الى الياء
قرار انك تبدأ وقرار انك تنهى
يمكن عشان عمرى ماجربته
سألت واتحكالى عنه
وحكالى هوا عنه
عجبنى الاحساس .. الاهتمام.. الخوف.. الاحتواء
كل ده بيقولوا عليه الحب
انك تعيش مع شخص مثالى فلازم تحب
الحب عندى كان تفاصيل
بحب تفاصيل مبهرة
زى ما بيقولو دى فى الافلام وبس
كانت الواقع بتاعى
بس لما تختفى التفاصيل
يتبقى المحتوى الحقيقى
تلاقى الانبهار خلاص انتهى
تعرف انه الحب كمان معاه انتهى
تخاف تظلم... فتتظلم
حب الامتلاك
طبيعة بشرية مقيتة
انك تحب تمتلك اى شئ بيحلم بيه الاخرين
تمتلك اى شئ صعب الوصول اليه
تمتلكه .. تتملكه .. وبعدها يصبح معتاد
بس لأ
الافضل انك تحافظ على نفسك
القلب شئ غالى قوى ماينفعش يتنقل من ايد لايد
الحلم ده انت .. ينفع تخلى حلمك تفصيل لاى ايد تخبط علي بابك
طول عمرى بحب جملة ...
اجمل يوم فى حياتك لسه ماجاش
السعادة ممكن تكون مش كاملة لو لوحدك منغير حد يشاركك فيها ويكملها معاك
بس صعب قوى
يمكن يكون مستحيل
الخوف احساس بيدمر كل حلم
الخوف صديق
الخوف هوا الامان
No comments:
Post a Comment